مولانا ہوش محمد پاشا استاذ فقہ اکیڈمی

شاعرِ انقلاب معین بسیسو

عظیم فلسطینی شاعر کی تحریکی زندگی اور ان کا ایک مشہور قصیدہ معین بن توفیق بسیسو ۱۹۲۶ء میں فلسطین کے شہر غزہ میں پیدا ہوئے۔ ابتدائی تعلیم غزہ شہر کے محلے شجاعیہ میں حاصل کی اور ۱۹۴۳ء میں غزہ کالج میں داخلہ لیا۔ محض اٹھارہ سال کی عمر میں ۱۹۴۴ء مین ان کا پہلا قصیدہ یافا کے رسالے الحریة میں شائع ہوا۔۱۹۴۶ء میں حیفا کے کمیونسٹ اخبار الاتحاد میں معین بسیسو کی قوم پرست نظمیں شائع ہونا شروع ہو گئیں۔انھوں نے ۱۹۴۷ء میں غزہ کی پٹی میں نیشنل لبریشن لیگ کے کچھ کمیونسٹ ارکان سے ملاقات کی اور کمیونسٹ بننے کے بعدسیاسی سرگرمیوں میں حصہ لینا شروع کیا۔ اس کے بعد ۱۹۴۸ ء میں قاہرہ (مصر) میں قائم امریکی جامعہ میں پڑھنے گئے اور ۱۹۵۲ء میں صحافت کے شعبے سے فراغت حاصل کی جس میں الکلمة المنطوقة والمسموعة في برامج إذاعة الشرق الأدنی نامی مقالہ لکھا۔ اس مقالے میں آپ نے اس دور کے جدید ذرائعِ اِبلاغ (ریڈیو اور ٹی وی)اور قدیم ذریعۂ اِبلاغ (اخبار) سے متعلق بحث کی ہے۔ قاہرہ میں قیام کے دوران کمیونسٹ ڈیموکریٹک موومنٹ فار نیشنل لبریشن کے نمائندہ رسالے الملایین نے بسیسو کی تخلیقات شائع کیں۔ ۱۹۵۲ء ہی میں آپ کا پہلا دیوان المعرکة شائع ہوا۔ قاہرہ سے غزہ واپس آنے کے بعد بسیسو ایک سرکاری اسکول میں استاذ ہو گئے۔ اسی عرصے میں انھیں نیشنل لبریشن لیگ کاسیکرٹری جنرل بھی منتخب کیا گیا۔ آپ نے اسرائیلیوں کے فلسطین پر جبری قبضے کا انکار کرتے ہوئے ان کے خلاف آواز اٹھائی اور اپنے قصائد کے ذریعے لوگوں کو اس بات پر ابھارا کہ اسرائیلیوں کے خلاف اُٹھ کھڑے ہوں۔ جس کی وجہ سے آپ کو دو مرتبہ (۵۷۔۱۹۵۵ء اور ۶۳۔۱۹۵۹ء) جیل بھی جانا پڑا۔ آپ کی انھی خدمات کے پیشِ نظر آپ کو ’’شاعرِ غزہ‘‘ کا لقب دیا گیا۔ جب اسرائیل نے ۱۹۶۷ء میں غزہ پر قبضہ کیا تو بسیسو غزہ چھوڑ کر دمشق چلے گئے جہاں انھوں نے شامی اخبار الثورة میں کام کیا اور ۱۹۶۸ء تک شامی ریڈیو کے لیے مختلف پروگرام بھی لکھے۔۱۹۷۲ء میں بسیسو بیروت منتقل ہو گئے اور یہاں فلسطینی مصنفین اور صحافیوں کی جنرل یونین کے جنرل سیکری ٹیریٹ کے رکن منتخب ہوئے اور ایفرو ایشین رائٹرز یونین کے جنرل سیکری ٹیریٹ کے رکن بھی بن گئے۔ بیروت میں قیام کے دوران یاسر عرفات کے مشیر بھی رہے۔ جس زمانے میں معروف انقلابی شاعر فیض احمد فیضؔ لبنان میں مقیم تھےاور حریتِ فلسطین کی جدوجہد میں پیش پیش تھے، معین بسیسو کے ساتھ ان کے گہرے مراسم تھے۔ حتیٰ کہ ۱۹۷۸ء میں حریت پسندوں کے معروف ثقافتی و سیاسی مجلے لوٹَس کے مدیر یوسف سباعی کے انتقال کے بعد لوٹَس کے شایانِ شان کسی مدیر کے تقرر کی ضرور آن پڑی تو معین بسیسو ہی یاسر عرفات کی طرف سے ادارت کی پیش کش لے کر فیضؔ کی خدمت میں حاضر ہوئے۔ بسیسو کچھ عرصہ تیونس میں بھی مقیم رہے۔ان کی تحریروں کا روسی، انگریزی، فرانسیسی، جرمن، اطالوی، ہسپانوی، جاپانی، ویتنامی اور فارسی زبانوں میں ترجمہ کیا گیا۔ ان کا ترجمہ وسط ایشیائی ریاستوں کی کئی زبانوں میں بھی کیا گیا جو کبھی سابق سوویت یونین کا حصہ تھیں۔معین بسیسو ۲۳، جنوری ۱۹۸۴ء کو لندن میں دل کا دورہ پڑنے سے انتقال کر گئے، ان کے اہلِ خانہ نے انھیں غزہ میں دفن کرنا چاہا لیکن اسرائیل نے انکار کر دیا، چنانچہ ان کی میت کو لندن سے تیونس اور پھر قاہرہ لے جایا گیا، جہاں انھیں قاہرہ کے مضافات میں اربعینات قبرستان میں سپردِ خاک کر دیا گیا۔معین بسیسو فلسطین کے بڑے اور نمائندہ شاعر اور ادیب تھے جنھوں نے کمیونسٹ اور قوم پرست حریت پسندوں کے ساتھ مل کر فلسطین کی آزادی کی خاطر اپنی عمر وقف کردی اور عالمی سطح پر فلسطین کی تحریکِ آزادی کا پیغام عام کیا، دنیا بھر کو غاصب صیہونیوں کے مظالم سے آگاہ کیا اور استقامت کی ایک مثال قائم کی۔ بسیسو محض’’انقلابی شاعر‘‘ اور ’’باغی شاعر‘‘ ہی نہیں غضب کے ڈرامہ نگار بھی تھے۔ ۲۰۱۵ءمیں، بیروت میں دار الفارابی نے بسیسو کے مکمل ادبی کاموں کو ستائیس کتابوں میں شائع کیا، جس میں شاعری کی تین، ڈراموں کی دو، اور نثر کی سات جلدیں شامل تھیں جن کی تفصیل کچھ یوں ہے: شاعری: المعركة،مارد من السنابل، فلسطين في القلب،الأشجار تموت واقفة، جئت لأدعوك باسمك، الآن خذي جسدي كيساً من رمل، القصيدة. ڈرامے:مأساة إرنستو تشي جيفارا، ثورة الزنج، شمشون ودليلة. نثر:نماذج من الرواية الإسرائيلية المعاصرة، يوميات غزة، أدب القفز بالمظلات، باجس أبو عطوان: مات البطل عاش البطل، البولدوزر، دفاتر فلسطينية، الاتحاد السوفييتي لي، ۸۸ يوماً خلف متاريس بيروت. درج ذیل قصیدہ بھی معین بسیسو کے اہم قصائد میں سے ایک ہے۔ اس قصیدے کو دو مختلف عنوانات کے ساتھ ذکر کیا جاتا ہے: سنقتلعُ الموتَ من أرضنا (ہم جلد ہی اپنی سرزمین سے موت کو اکھاڑ پھینکیں گے) اور الطریقة إلی الزِنزانة (جیل کا راستہ)۔کیونکہ اس قصیدے میں ایک مردِ مجاہد کے اُن احوال کا ذکر ہے جو اسے جیل خانے کی طرف جاتے ہوئے پیش آتے ہیں، جس وقت سپاہی اس کو بغیر کسی وجہ کےگھر سے جیل لے جا رہے ہوتے ہیں: